पालघरचा आवाज आता जागतिक स्तरावर; डॉ. हेमंत सवरा संसदीय मैत्री गटात
पालघर : पालघर लोकसभा मतदारसंघाचे लोकप्रिय खासदार डॉ. हेमंत सवरा यांच्या शिरपेचात मानाचा आणखी एक तुरा रोवला गेला आहे. जागतिक स्तरावर भारताचे संसदीय संबंध अधिक मजबूत करण्याच्या उद्देशाने लोकसभा अध्यक्ष ओम बिर्ला यांनी स्थापन केलेल्या संसदीय मैत्री गटात (Parliamentary Friendship Group) त्यांची मलेशिया देशासाठी निवड करण्यात आली आहे. या नियुक्तीमुळे पालघर जिल्ह्याचा सन्मान राष्ट्रीय तसेच आंतरराष्ट्रीय स्तरावर उंचावला आहे.
काय आहे संसदीय मैत्री गट उपक्रम?
भारताची जागतिक उपस्थिती अधिक प्रभावी करणे आणि विविध देशांच्या संसदांशी थेट संवाद प्रस्थापित करणे हा या उपक्रमाचा मुख्य उद्देश आहे. लोकसभा अध्यक्षांच्या पुढाकारातून ६० हून अधिक देशांसाठी संसदीय मैत्री गट स्थापन करण्यात आले असून त्यामध्ये विविध राजकीय पक्षांतील खासदारांचा समावेश करण्यात आला आहे. या शिष्टमंडळांमार्फत तब्बल ६४ देशांशी संसदीय संवाद, धोरणात्मक सहकार्य आणि लोकशाही पद्धतींची देवाण-घेवाण केली जाणार आहे.
मलेशिया दौऱ्यात महत्त्वाच्या विषयांवर चर्चा
डॉ. सवरा यांचा समावेश असलेल्या शिष्टमंडळाकडून आगामी दौऱ्यात अनेक महत्त्वपूर्ण विषयांवर चर्चा अपेक्षित आहे :
- व्यापार व गुंतवणूक : भारत-मलेशिया आर्थिक संबंध अधिक मजबूत करण्यावर भर.
- तंत्रज्ञान व शिक्षण : आधुनिक तंत्रज्ञान आणि शैक्षणिक सहकार्य वाढवण्याचे प्रयत्न.
- सांस्कृतिक समन्वय : दोन्ही देशांतील सांस्कृतिक नातेसंबंध दृढ करण्यासाठी उपक्रम.
- संसदीय कार्यप्रणाली : लोकशाही व्यवस्थेतील सर्वोत्तम संसदीय पद्धतींची देवाण-घेवाण.
पालघरमध्ये आनंदाचे वातावरण
आंतरराष्ट्रीय स्तरावर भारताचे प्रतिनिधित्व करण्याची संधी पालघरच्या खासदारांना मिळाल्याने संपूर्ण जिल्ह्यात आनंदाचे वातावरण निर्माण झाले आहे. “जनतेने दिलेला विश्वास, सातत्यपूर्ण जनसंपर्क आणि विकासकामांमुळेच ही मोठी जबाबदारी त्यांच्यावर सोपविण्यात आली आहे,” अशा भावना कार्यकर्त्यांकडून व्यक्त केल्या जात आहेत.
या नियुक्तीबद्दल डॉ. सवरा यांच्यावर सर्व स्तरातून अभिनंदनाचा वर्षाव होत असून त्यांच्या पुढील यशस्वी वाटचालीसाठी शुभेच्छांचा वर्षाव होत आहे.
