पुणे :
प्रादेशिक परिवहन कार्यालय (RTO) पुणे यांनी वाहन चालविण्याच्या चाचणी परीक्षेच्या कोट्यात वाढ करण्याचा महत्त्वपूर्ण निर्णय घेतला असून, आता शनिवार व रविवारी सुट्टीच्या दिवशीही वाहन चाचणी परीक्षा घेतली जाणार आहे. या निर्णयामुळे पुणेकर वाहन चालकांना मोठा दिलासा मिळाला आहे.
प्रादेशिक परिवहन कार्यालय पुणे यांच्या आदेशानुसार प्रादेशिक परिवहन अधिकारी Archana Gaikwad यांनी संबंधित अधिकाऱ्यांसोबत बैठक घेतली. या बैठकीस उपप्रादेशिक परिवहन अधिकारी Swapnil Bhosale व सहाय्यक प्रादेशिक परिवहन अधिकारी Rahul Jagdale उपस्थित होते. अधिकाऱ्यांच्या उपलब्धतेनुसार वाहन चाचणी परीक्षेचा कोटा वाढविण्याचा निर्णय घेण्यात आला.
याशिवाय, निवडणुकांनंतर परिवहन आयुक्त कार्यालय महाराष्ट्र राज्य यांची मान्यता मिळाल्यानंतर एस.टी. महामंडळाच्या भोसरी येथील ट्रॅकवर अतिरिक्त वाहन चाचणी परीक्षा घेण्यात येणार आहेत. यामुळे अधिक जागा उपलब्ध होणार असून पूर्वनियोजित वेळेत परीक्षा देणे सुलभ होणार आहे.
शनिवार–रविवारी परीक्षा घेण्यासंदर्भात एनआयसीसोबत समन्वय साधण्यासाठी उपायुक्त (संगणक) Shailesh Kamat यांनी पुढाकार घेतला. तसेच आयडीटीआर पुणे येथेही सुट्टीच्या दिवशी वाहन चाचणी परीक्षेसाठी अधिकारी संख्या वाढविण्यात आली आहे.
या निर्णयामुळे वाहन चाचणी अपॉइंटमेंटसाठी प्रतीक्षा करणाऱ्या पुणेकरांना मोठा दिलासा मिळाला असून, उपलब्ध वाढीव कोट्याचा लाभ घेण्याचे आवाहन प्रशासनाने केले आहे.
या प्रसंगी मोटार ड्रायव्हिंग स्कूल ओनर्स असोसिएशनचे अध्यक्ष राजू घाटोळे, अॅड. निलेश गांगुर्डे, वरिष्ठ उपाध्यक्ष अनंत कुंभार, संदीप ढेरंगे, सोशल मीडिया प्रमुख सुरज देवकर (पत्रकार), अक्षय काळे, राहुल निकाळजे, अब्दुला काझी आदी उपस्थित होते.
प्रादेशिक परिवहन अधिकारी व परिवहन आयुक्त कार्यालयाच्या प्रयत्नांमुळे हा प्रश्न मार्गी लागल्याबद्दल संबंधित सर्व अधिकाऱ्यांचे अभिनंदन करण्यात येत आहे
